Padri Benard Malich wa Jimbo Katoliki la Embu amewataka Wakristo kuishi kwa uaminifu, uadilifu na maadili mema huku akiwahimiza viongozi wa kisiasa kuongoza kwa uwazi na kuwajibika wanapojiandaa kwa Uchaguzi Mkuu wa mwaka 2027.
Akizungumza katika maadhimisho ya Sikukuu ya Watakatifu Petro na Paulo yaliyofanyika Parokia ya Mtakatifu Paulo Makima, Padri Malich alikemea ufisadi, utoaji wa hongo na kuwaonea wengine kwa manufaa binafsi, akisema vitendo hivyo vinadhoofisha haki na uongozi bora. Aliwataka viongozi kutekeleza wajibu wao badala ya kulaumiana na kushughulikia changamoto zinazowakabili wananchi, ikiwemo huduma za afya.
Padri huyo aliwahimiza Wakristo kuiga mfano wa Mtakatifu Paulo kwa kusimama imara katika imani na kufanya kazi kwa bidii ili kujitegemea. Alisisitiza kuwa anayekataa kufanya kazi hastahili kula.
Aidha, aliwataka wanaume kuwa mifano bora kwa familia zao kwa kuwa watoto hujifunza kutokana na matendo ya wazazi. Aliwahimiza waumini kumtegemea Mungu wanapokabiliwa na changamoto badala ya kukimbilia wanaodai kufanya miujiza. Pia aliwaonya vijana, hasa wa kizazi cha Gen Z, dhidi ya kurubuniwa kushiriki katika vurugu za kisiasa, akisisitiza umuhimu wa uraia mwema na uwajibikaji.