Ekari a kuuma Ndumari, wandi ya Gaturi South gicigorimbunge kia Manyatta nimarurunganite na kuvinga njira iria ituithanitie kuuma Karurina gukinya Kivwe ni kiria maragweta ni kuthukanga kwayo.
Ekari aya maramukire na kwinja mutaro njirari ino vamwe na kumivanda ndigu vakuvi na Magomeri vuva wa gukorwa itarathiika. Ino ni vuva wa roli ya migate gukorwa irakwamite vandu vau utuku wa gukia umunthi undu utumire mamirute kuria iraremerete.
Wavo nimaugite njira ino ikoretwe ikimaretera mitino mavinda kwa mavinda nundu wa gukorwa yucurite mikaro iria iratuma uthii ukorwe uri murito.
Nimathiite nambere na gutariria makiuga mumbunge wao Gitonga Mukunji numatiganiritie vuva wa kumeriria kumathondekera njira ino nwati ndavingia ciiraniro ciake.
Wavo nimaugite uria njira ino ikwamitie mithiire na maundu mengi mengi, nigukorwa nginya ciana niiremirwe ni kuthii cukuru vuva wa ngaari cia kumagira ciaremwa ni gukinya.
Nimaugite nimakoretwe na morito gukinya thokori, undumwe na kumira riria mavatara motungata ta ma ugima wa mwiri.
Riu nimaugite mathondekerwe njira ino kana moce makinyo ma kumivinga wamuthenya nginya ikathondekwa.