Minister wa ugitiri wa ndari ya vururi Kipchumba Murkomen nuugite ntharikira iria yekikire kanithari wa ACK Witeithie mwena wa Nyeri yacungirirue ni mbukaniriro cia giciaca kauntiri ino.
Akiaria mbere ya mbunge ya senate muthenya wa jumatano, Murkomen augite uthuthuria uria wikikite gukinyagia riu wonanitie ntharikiro ino ndianakuruvania maavitha a vorithi na njira wa yonthe.
Nuthiite nambere na kuuga Rigathi Gachagua uria watharikirwe na kumuviririra kuura ndamenyithitie kanitha iyo kana nugukorwa agikinyia kuo, na kwoguo maavitha a ugitiri matianamenya kana kuri na mundu wa ngathu yeguru ugukorwa kuo.
Wavo Murkomen nuuraikorire vaceke gucokia ciuria cia niki gitumi maavitha a vorithi maikunikaga uthiu riria marang’ethanira na mwngi wana thengia ya gukorwa igooti rinene riamurire matigaikunikage.
Agicokia kiuria giki Murkomen augite ngovia cia gwikunika cia maavitha a vorithi ni gati ka uniform na maikunikaga niguo matikamenyekane riria mekurua na itoi.